Eph 2 | BEF | STEP | Lenali koyapa'i ka mekehelise minete foipanagu mine'ahana to yamu'i lenemehi filito bigo mine'ahana yabe.

Ephesians 2

Lemehati fili'ehinaguti lele'mo kosaba hu'ehina

1 Lenali koyapa'i ka mekehelise minete foipanagu mine'ahana to yamu'i lenemehi filito bigo mine'ahana yabe. 2 Ya'ma kanagu'ya lenali melugu bona'magihi foipa kapogu foipanamofihi komopagu bila ela hite foipa kene'magihi kaba bo'ani Sataha amuyalo minete aitoga i ke'mete minelata hi'ahanamo ni'ibe. 3 Lali asaga'i koyapa'i enali tegi huto minoto komopatimofihi ka laga'a mege'i moloto mega lugufamofihi to kehelise'natimofihi kaga'a keheliya iloto mino'ohuta. Ya huto komopatigu foipa hiti nohutoti enali tegi huto Hu'mau foipana'mu ipakafa osahi limilina suhi huto mino'ohuta ni'ibe.

4 Ya huto nohutogo Hu'mau ai'a mehi limise'na babu luto minana'mu yabe luto sipi ginaga fi letoto komopa'a limi'ehinamo ni'ibe. 5 Ya nohuto lali foipanatimomu'i lemehati filito bigo nohutogo Kilisitou fili'ehinagati le'mo ho ti'ahanalo lubuto bito lele'mo'ehina yabe. Ya huto ai ginaga fi lepolo'ehina'amu lenubuto bi'ehinamo ni'ibe, nekehelifiye? 6 Ai Yesu Kilisito hiti moneka kokulumagu huto minoto asaga'na kaba huto minalune luto lele'mo ho tito aitoga lele'mo hepi'ehina yabe. 7 Hena'mube? Hu'mau ai ya'ma alihi huto huto alina kana'alo yanagu sipi ginaga fi limise'na hiti to hetofa lehe'mose'na'a hiti ya'ma Yesu Kilisito kumu yabe luto lu'ehinamo ni'igo yamofihi nasana'a kehelito minomo buto kehelilune. 8 Nekehelifiye? Hu'mau lali hetofa suhi huto minolatanatilo lubuto bina meni'ibe. O'e, ai'a ginaga fi leto'ehinalo agoya hu nimilata nehana'mu yabe luto lubuto bi'ehina ni'ibe. To ya'ma agoya hu emutana laliti meni'ibe. Ai Hu'mau fa'mene lele'mo ya huto hu'ehina yabe. 9 To ya higo hena hena foya lito minenogo ya'ma suhi lolo hu leto'ehina ni'ibe? Yamofihi meni'ibe. Yamofi kumu lugufa lelito tise'namofihi meni'ibe. 10 Lali Hu'mamofihi yahi fayaha'a nohutogo ai'a Yesu Kilisitotoga molo emutamofihi foya lilabe luto lele'mo huto hu'ehibe. To ana foyamo lite bona'magi enehe'mete minalabe luto koyapa'i lu kehelito molo leto'ehina yabe.

Kilisitotoga lele'mo moneko hu'ehina yabe

11 Lenali koyapa'i fegutoga bona'i mine'ahana lenegekesu meheno. To yamofihi kana'agu Yuta bona'magi enali Hu'mamofihi keya'i kumu yabe lite enugufalo laga hi'ahana hiti mine'ahana lenali kumu fayahatini meni'ina bona'i nehabe lite mega enugufalo faya kumu li'ahanamo ni'ibe. 12 Ana kanagu lenali Kilisito hiti hepite memine'ahana ni'ibe. To Yuta bona'i enali fulilo meminese lenali fa'mene ino bano mine'ahana. To Hu'mau ai'a bonatoga lu molo epolo'ehina kaga alihi le'mo huto hilina ka yabe luto lu molo epolo'ehina kaga lenalitoga lu memalago lenali fegutoga bona'i fa'mene mine'ahana yabe. Lenali Hu'mamofihi mekehelise nehite ai lele'mo bati hilibe lite mekehelise minete ma melugu fa'mene sibina hite mine'ahana ni'ibe. 13 Lenali ana kanagu foto'i mine'ahana bona'i yatai Yesu Kilisitotoga hepite minago Kilisitohi golaha'auba lenele'mo gegisa'agu lenele'mo malago Hu'mamofitoga nehetite nehabe. 14 Kilisitou ai'a lele'mo fulu hilata bo nohibe. Ai lali asaga'i Yuta bona'i hiti fegutoga bona'i hiti lele'mo fulu higo moneko bona'i lolo nohune. To folagahatigu hasa mino'ehinana li tele bito nohe'mito lele'mo hepi'ehinamo ni'ibe. 15 To ai Kilisitou Yuta bona'magihi keya kamofihi komopa'agu ya'ma lilo melilo lite fato fato ka li'ahanamo ya'ma pa salube luto ai'a gufa'a nohe'mito fili'ehigo ana ka su ho'ehina ni'ibe. To ya huloto lali loe bona'i fatehi mino'ohuta bona'i kosaba naga'i moneko lele'mo huto huloto aitoga lele'mo hepilago lali fulu huto koguna ito nominota ni'ibe. 16 Ai malipu yafalo nofilito lali'i loe bona'i lipakafa lohoto luba sabo huto mino'ohuta yamofihi i laga hu letoto lele'mo moneko huto Hu'mamofitoga lele'mo molo'ehinamo ni'ibe. 17 Ya huto foto'i mine'ahana fegutoga bona'i lenali to lebato'isi gegisagu mino'ohutamo Yuta bona'i lali asaga'i fulunamofihi kaga ka lamana'a lu yege hoto limigo keheli'ohune. 18 Kilisitou ya huto kapo bili letolago lali Yuta bona'i to lenali fegutoga bona'i lali asaga'i Hu'mamofihi Sikalafu'uba lehe'menogo afotifu nohinaga bu nehetilata nohune.

19 Ya higo yatai lenali fegutoga bona'i fa'mene fato bona'i meneminana yabe. Lenali hiti Hu'mamofihi naga'i enali hiti Hu'mamofihi hepa'i bona'a lolo nehabe. To Hu'mamofihi yagapana'a lolo huto nehabe. 20 Ya huto ni'igo lali Hu'mamofihi bona'i asaga'i nopo tegi huto nominone. Enali aposolo bo to Hu'mamofihi ka lu yege hose bona'i enali lukesa'a lolo hite nehago yamagihi enugupisalo lele'mo malago minomo buto nohune. To Yesu Kilisito ai nohi ya'ma lapusa'a lolo huto nohibe. 21 Ya huto ai nohi asaga'i lele'mo ule'ale higo i ke'moto buto lamana nohi Sipi Botimofihi yabe luto minomo buto sipi huto hiluta nohibe. 22 To lenali hiti bona'i luga'a hiti Kilisitotoga hepilete Hu'mamofihi noha'a lolo hite nehago ai'a Sikalafu'auba ana nonugu minolata nohibe.